Thursday 10 December 2009
ក្រមសីលធម៌
ក្រមសីលធម៌
ការប្រកាន់ខ្ជាប់នូវបទដ្ឋានវិជ្ជាជីវៈសារព័ត៌មានខ្ពស់គឺជាចំណុចស្នូលនៃបេសកកម្មរបស់វិទ្យុអាស៊ីសេរី ។
ព័ត៌មានដែលត្រូវផ្សាយលើរលកធាតុអាកាស និងនៅលើប្រព័ន្ធអ៊ិនថឹណិត ហើយនិងកម្មវិធីផ្សេងៗទៀតរបស់យើងត្រូវតែមានលក្ខុណៈសុក្រឹត ត្រឹមត្រូវ និងមានតុល្យភាព។
ភាពចម្រុះនៃគំនិត និងមតិយោបល់
យើងត្រូវតែរក្សានូវរបៀបនិយាយដែលមានលក្ខណៈ ស្ងប់ស្ងៀម និងមិនលាយឡំមនោសញ្ចេតនាឡើយ ហើយយើងក៏ត្រូវចៀសវាងការបង្កជម្លោះ ការឃោសនា និងការបង្ខូចកេរ្តិ៍ឈ្មោះទៅលើបុគ្គលណាម្នាក់ ក្រុមណាមួយ ឬក៏រដ្ឋាភិបាលណាមួយផងដែរ ។ យើងនឹងមិនបង្គាប់បញ្ជា ឬក៏និយាយមើលងាយអ្នកស្ដាប់របស់យើងឡើយ ។
យើងមិនត្រូវញុះញង់អ្នកស្ដាប់ឲបង្កអំពើ ហិង្សា ឬក៏ជំរុញឲមានការបះបោរ ឬក៏ ការចាកចោលស្រុកនោះឡើយ ។ យើងបង្កើតជាវេទិកាសម្រាប់ការបញ្ចេញមតិ និងយោបល់ផ្សេងៗ ពីគ្រប់មជ្ឈដ្ឋាន ។
ទាំងនិពន្ធនាយកនៃគេហទំព័រវ៉ិបសាយ និងទាំងអ្នកផ្សាយព័ត៌មានតាមរលកធាតុអាកាស ត្រូវតែធានាថា ព័ត៌មានដែលត្រូវផ្សាយ ឬក៏ត្រូវបោះពុម្ពលើគេហទំព័រ មិនមែនជាព័ត៌មានចចាមអារ៉ាម ឬក៏ជាដំណឹងដែលគ្មានភស្តុតាងបញ្ជាក់នោះឡើយ ។ យើងត្រូវតែរកប្រភពឲបានលើសពីមួយសម្រាប់ព័ត៌មានរបស់យើងតាមការ ដែលអាចធ្វើបាន ។ យើងត្រូវតែមានភាពឯករាជពីគណបក្សនយោបាយ ក្រុមប្រឆាំង អង្គការដែលនៅក្រៅប្រទេស ឬក៏សាសនានានា ហើយយើងក៏មិនគាំទ្រដល់ទស្សនៈនយោបាយណាមួយឡើយ ។
យើងត្រូវបញ្ជាក់អត្តសញ្ញាណនៃអ្នកបរិច្ចាគ ស្នាដៃពីខាងក្រៅ ដោយប្រកាសនៅចុងបញ្ចប់នៃការអត្ថាធិប្បាយរបស់អ្នកនោះថា ការបញ្ចេញមតិរបស់អ្នកនោះមិនមែនជាទស្សនៈ ឬយោបល់របស់វិទ្យុអាស៊ីសេរីឡើយ ។
ការបញ្ជាក់អំពីប្រភពឲបានពេញលេញ
នយោជិតរបស់វិទ្យុអាស៊ីសេរី មិនត្រូវទទួលយកអំណោយ ឬក៏ការធ្វើដំណើរដោយឥតគិតថ្លៃពីប្រភពព័ត៌មានឡើយ ។ នៅពេលណាដែលយើងយកព័ត៌មានពីស្ថាប័នព័ត៌មានផ្សេងទៀត យើងនឹងបញ្ជាក់យ៉ាងពេញលេញថា យើងបានស្រង់ព័ត៌មានពីស្ថាប័ននោះ ។
នៅពេលយើងមានកំហុសក្នុងការផ្សាយតាមរលកធាតុ អាកាស ឬក៏នៅលើប្រព័ន្ធទំព័រវ៉ិបសាយ យើងនឹងទទួលស្គាល់កំហុសចំពោះអ្នកស្ដាប់ និងអ្នកអានរបស់យើង ក៏ដូចជាធ្វើសេចក្ដីកែតម្រូវផងដែរ ។
យើងមិនត្រូវទទួលយកការងារខាងក្រៅ ដែលអាចប៉ះពាល់ដល់ការទទួលខុសត្រូវរបស់យើងចំពោះវិទ្យុអាស៊ីសេរី ឡើយ ។ ជនណាក៏ដោយ ដែលទទូលយកការទទួលខុសត្រូវសំខាន់នៅខាងក្រៅ ដោយរាប់បញ្ចូលទាំងការថ្លែងសុន្ទរកថា និងការបង្ហាញខ្លួនជាសារធាណៈផ្សេងទៀត ដែលមានការពាក់ព័ន្ធនឹងសកម្មភាពរបស់វិទ្យុអាស៊ីសេរី ត្រូវតែទទួលបានការអនុញ្ញាតជាមុនសិន ។
អ្នកធ្វើការតាមកុងត្រា ត្រូវប្រកាន់ខ្ជាប់តាមបទដ្ឋានរបស់វិទ្យុអាស៊ីសេរី
ក្នុងការប្រមូលព័ត៌មានសម្រាប់ការសរសេរដំណឹង អ្នកយកព័ត៌មានរបស់យើង មិនត្រូវណែនាំខ្លួនឯង ថាជាអ្វីផ្សេងពីអ្នកសារព័ត៌មានរបស់វិទ្យុអាស៊ីសេរីឡើយ ។
យើងនឹងផ្តល់កុងត្រាការងារដល់អ្នកជំនាញ ដូចជាអ្នកនិពន្ធ អ្នកបញ្ចេញមតិលើផ្នែកអក្សរសាស្រ្ត ប្រវត្តិវិទូ និងអ្នកជំនាញផ្សេងទៀត ។ ក្នុងរាល់ករណីទាំងអស់ វិទ្យុអាស៊ីសេរី សូមរក្សាសិទ្ធិធ្វើការកែសម្រួលលើការងាររបស់អ្នកទាំងនោះ ហើយធ្វើការសម្រេចចិត្តថាតើអ្វីខ្លះដែលត្រូវផ្សាយតាមរលកធាតុ អាកាស ឬក៏តាមគេហទំព័ររបស់យើង ។ អ្នកធ្វើការតាមកុងត្រារបស់វិទ្យុអាស៊ីសេរីគួរតែប្រកាន់ខ្ជាប់ នូវបទដ្ឋានក្រមសីលធម៌វិជ្ជាជីវសារពត៌មានរបស់វិទ្យុអាស៊ីសេរី ៕